ფინანსთა მინისტრის შეხვედრა თბილისის თავისუფალ უნივერსიტეტში

თარიღი: 07-ივნისი-2009

   მიმდინარე წლის 7 ივნისს, ფინანსთა მინისტრი კახა ბაინდურაშვილი თბილისის თავისუფალ უნივერსიტეტში პროფესორ-მასწავლებლებსა და სტუდენტებს შეხვდა, სადაც მინისტრმა დეტალურად ისაუბრა 2009 წლის სახელმწიფო ბიუჯეტში დაგეგმილი ცვლილებების, სამინისტროში მომზადებული საკანონმდებლო ინიციატივებისა და ქვეყნის მაკროეკონომიკური მდგომარეობის შესახებ. სტუდენტები ძირითადად დაინტერესდნენ რა სფეროებზე გადანაწილდება გაზრდილი საბიუჯეტო ასიგნებები, რას ითვალისწინებს ფისკალური სტიმულირების გეგმა და როგორია ინვესტიციების შემოსვლის პერსპექტივა ქვეყანაში.
   „ასეთი ტიპის შეხვედრები მომავალშიც გაგრძელდება, რათა მთავრობის მიერ შემუშავებული პოლიტიკა მაქსიმალურად იყოს შეჯერებული საზოგადოების სხვადასხვა ფენასთან. შეხვედრაზე შევთანხმდით, რომ უახლოეს პერიოდში ჩვენ წარვადგენთ სახელმწიფო ფინანსების რეფორმის სტრატეგიას, რომლის განხილვის დროსაც შესაძლებლობა მოგვეცემა გავიგოთ სპეციალისტებისა და ჩვენი მომავალი ფინანსისტებისა და ეკონომისტების შეხედულებებიც,”  - განაცხადა ფინანსთა მინისტრმა შეხვედრის დასრულების შემდეგ.