OPIC-ის ვიცე-პრეზიდენტის ვიზიტი საქართველოში

თარიღი: 28-ივლისი-2009

საქართველოში საქმიანი ვიზიტი დაიწყო საერთაშორისო კერძო საინვესტიციო კორპორაციის (OPIC) ვიცე-პრეზიდენტმა როდ მორისმა. მიმდინარე წლის 28 ივლისს, სასტუმრო „ქორთიარდ მარიოტში” (OPIC)-ის ვიცე-პრეზიდენტმა შეხვედრა გამართა ბიზნესსაზოგადოებასთან. შეხვედრას ასევე დაესწრნენ ფინანსთა მინისტრი კახა ბაინდურაშვილი და საინვესტიციო რისკების მართვის სააგენტოს (IRMA) ხელმძღვანელი ზურაბ სიმონია.

ფინანსთა მინისტრის კახა ბაინდურაშვილის განცხადებით, ბოლო 9 თვის განმავლობაში საქართველო შევიდა იმ 15 ქვეყნის რიცხვში, სადაც OPIC-ს ყველაზე დიდი საფინანსო პორტფელი აქვს. მისი თქმით, ქართველი ბიზნესმენებისათვის OPIC-ის უკვე ორივე ინსტრუმენტია ხელმისაწვდომი – საინვესტიციო პროექტების დაფინანსება და დაზღვევა. „OPIC-ის დაფინანსება უკვე 200 მლნ დოლარს შეადგენს, საიდანაც 100 მლნ წლის ბოლომდე მივიღებთ. OPIC-ის ვიცე-პრეზიდენტის ვიზიტი საქართველოში, ხელს შეუწყობს სრულფასოვნად ამოქმედდეს საერთაშორისო კერძო საინვესტიციო კორპორაციის დაზღვევის ინსტრუმენტიც და ინვესტორებს აღნიშნულ თანხებთან წვდომაც გაუმარტივდეთ,” - განაცხადა ფინანსთა მინისტრმა.     
                               
საქმიანი ვიზიტის ფარგლებში ასევე დაგეგმილია OPIC-ის ვიცე-პრეზიდენტის შეხვედრა პრემიერ-მინისტრთან. ასევე გასვლა ქვეყნის რეგიონებში, სადაც გაიმართება შეხვედრა ადგილობრივ ბიზნესწრეებთან არსებული საინვესტიციო გარემოს გაცნობის მიზნით.