მიმდინარე წლის 25 მარტს, სატელეფონო საუბარი შედგა ფინანსთა მინისტრ ნოდარ ხადურსა და მსოფლიო ბანკის აღმასრულებელ დირექტორ ფრანკ ჰიმსკერკს შორის.
საუბარი შეეხო საქართველოს ეკონომიკაში მიმდინარე პროცესებს, მსოფლიო ბანკის მხარდაჭერით დაფინანსებული პროექტების მიმდინარეობას, ასევე, განიხილეს ქვეყნის ეკონომიკის განვითარების სამომავლო პერსპექტივა და აღნიშნულ პროცესში მსოფლიო ბანკთან თანამშრომლობის საკითხები. როგორც საუბრისას მსოფლიო ბანკის აღმასრულებელმა დირექტორმა აღნიშნა, იგი მოხარულია, რომ საქართველოში შენარჩუნებულია ეკონომიკური ზრდის ტემპი და ის მაღალია ზოგიერთ ევროპულ ქვეყანასა და ყოფილი საბჭოთა კავშირის ქვეყნებს შორის.
მხარეებმა იმედი გამოთქვეს, რომ საქართველოსა და მსოფლიო ბანკს შორის თანამშრომლობის საკითხები უფრო დეტალურად იქნება განხილული აპრილში, ვაშინგტონში, საერთაშორისო სავალუტო ფონდისა და მსოფლიო ბანკის ყოველწლიური შეხვედრის ფარგლებში დაგეგმილი ორმხრივი შეხვედრების დროს.