საქართველოს ფინანსთა მინისტრის მოადგილემ, დავით ლეჟავამ კომენტარი გააკეთა აზიის ინფრასტრუქტურული ინვესტიციების ბანკის დაფუძნების თაობაზე. მისი თქმით, იქმნება ახალი ბანკი, რომელიც ხელს შეუწყობს ინვესტიციების განხორციელებას ინფრასტრუქტურაში. „ესაა ახალი შესაძლებლობა ჩვენი ქვეყნისთვის, რათა განხორციელდეს უფრო მეტი ინფრასტრუქტურული პროექტი. სწორედ ამიტომ, საქართველომ გამოხატა ინტერესი, როგორც დამფუძნებელი ქვეყანა შეერთებოდა აღნიშნულ ბანკს. ეს მოგვცემს საშუალებას, სხვა ქვეყნებთან ერთად ვიმუშაოთ სადამფუძნებლო დოკუმენტებზე, რათა გათვალისწინებული იყოს ჩვენი ინტერესები“, - განაცხადა ფინანსთა მინისტრის მოადგილემ.
მისი თქმით, სადამფუძნებლო დოკუმენტებზე მუშაობა ახლა იწყება და უნდა დასრულდეს 2015 წლის განმავლობაში. „ვფიქრობთ, ბანკის ინვესტიციები საქართველოში, მნიშვნელოვანი იქნება ქვეყნის სატრანზიტო პოტენციალის გასაზრდელად. აღნიშნული ბანკი ახალ შესაძლებლობებს შესძენს განვითარებად ქვეყნებს და ასევე ითანამშრომლებს უკვე არსებულ დონორ ორგანიზაციებთან“, - აღნიშნა ფინანსთა მინისტრის მოადგილემ.