მიმდინარე წლის 25 ივნისს, ფინანსთა მინისტრი ნოდარ ხადური დაესწრო საქართველოს მთავრობისა და დონორთა საკოორდინაციო შეხვედრას, რომელიც მიზნად ისახავდა აღმოსავლეთ-დასავლეთის ჩქაროსნული დერეფნის გაუმჯობესების პროგრამის განხილვას.
შეხვედრა მსოფლიო ბანკისა და რეგიონული განვითარებისა და ინფრასტრუქტურის სამინისტროს ორგანიზებით, სასტუმრო „ქორთიარდ მარიოტში“ გაიმართა.
ღონისძიებას დაესწრნენ ვიცე-პრემიერი, ეკონომიკისა და მდგრადი განვითარების მინისტრი გიორგი კვირიკაშვილი, რეგიონული განვითარებისა და ინფრასტრუქტურის მინისტრი ნოდარ ჯავახიშვილი, მსოფლიო ბანკის რეგიონული წარმომადგენლობის დირექტორი სამხრეთ კავკასიაში ჰენრი კერალი.
როგორც შეხვედრაზე ფინანსთა მინისტრმა განაცხადა, საქართველოში ინფრასტრუქტურის სხვადასხვა სექტორების განვითარება მნიშვნელოვანია ქვეყნის ეკონომიკური განვითარების თვალსაზრისით და ამ მიმართულებით მთავარ პრიორიტეტად რჩება საგზაო ინფრასტრუქტურის განვითარება. მისი თქმით, უმნიშვნელოვანესია, დონორებთან ერთად შემუშავდეს საქართველოს ერთ-ერთი ძირითადი სატრანზიტო არტერიის აღმოსავლეთ-დასავლეთის ჩქაროსნული ავტომაგისტრალის ყველაზე რთული მონაკვეთის: რიკოთი - ზესტაფონის პროექტის განხორციელების გზები როგორც ფინანსური, ასევე ტექნიკური თვალსაზრისით.
შეხვედრაზე განიხილეს აღმოსავლეთ-დასავლეთის ჩქაროსნული ავტომაგისტრალის რიკოთისა და არგვეთის მონაკვეთების ტექნიკურ-ეკონომიკური დასაბუთების კვლებისა და ღირებულების შესაბამისობის ანალიზის შედეგები.
აღნიშნული მაგისტრალის გაუმჯობესება უმნიშვნელოვანესია საქართველოს სატრანსპორტო და ლოჯისტიკურ ჰაბად გარდაქმნისთვის.