ჩინეთსა და საქართველოს შორის ორმხრივი სავაჭრო-ეკონომიკური ურთიერთობების საკითხები იყო განხილვის ერთ-ერთი მთავარი თემა ფინანსთა მინისტრ ნოდარ ხადურსა და ჩინეთის ფინანსთა მინისტრის მოადგილეს ში იაობინს შორის გამართული მოლაპარაკებების დროს.
ფინანსთა მინისტრმა სტუმარს მადლობა გადაუხადა იმ მხარდაჭერისთვის, რომელსაც ჩინეთის მთავრობა უწევს საქართველოს როგორც ტექნიკური დახმარების, ისე გამოცდილების გაზიარების მიმართულებით.
განსაკუთრებით მნიშვნელოვანია ის თანამშრომლობა, რომელიც აქტიურად მიმდინარეობს ფინანსთა სამინისტროსთან ჩვენი ქვეყნის საბაჟო ინფრასტრუქტურის აღჭურვის მიმართულებით.
მხარეებმა ასევე იმედი გამოთქვეს, რომ გაგრძელდება აქტიური კომუნიკაცია ქართველ და ჩინურ კომპანიებს შორის სხვადასხვა სექტორში, მათ შორის ისეთ სფეროებში როგორიცაა სოფლის მეურნეობა, ენერგეტიკა, ინფრასტრუქტურა, ჯანდაცვა.
საუბარი ასევე შეეხო ევროპასა და აზიას შორის დამაკავშირებელი სატრანსპორტო და ლოგისტიკური შესაძლებლობების განვითარებას და ამ კუთხით, ჩვენი ქვეყნის პოტენციალის გამოყენებას. როგორც აღინიშნა, საქართველოს აქვს ყველა შესაძლებლობა გადაიქცეს „აბრეშუმის გზის“ ერთ-ერთ საკვანძო ქვეყნად.