ფინანსთა სამინისტროს შემოსავლების სამსახურის საბაჟო დეპარტამენტის ინფორმაციით, დღეის მდგომარეობით, „ყაზბეგის“ საბაჟო-გამშვები პუნქტი შეუფერხებლად მუშაობს.
ამ დროისთვის, რუსეთის ფედერაციის მხარეს, „ლარსის“ საბაჟო-გამშვებ პუნქტზე, გარკვეული შეფერხებები აქვთ თურქეთის რესპუბლიკიდან რუსეთის ფედერაციის მიმართულებით ტრანზიტულად მოძრავ ტვირთებს.
მითითებული ტვირთებიდან უკან მობრუნებული სატვირთო ა/მანქანების ნაწილი მძღოლების მოთხოვნის შესაბამისად, გაიგზავნა აზერბაიჯანის ან თურქეთის რესპუბლიკების მიმართულებით.
დარჩენილი მანქანები გაჩერებულები არიან ე.წ ნეიტრალურ ტერიტორიაზე და ელოდებიან რუსეთის ფედერაციაში შესვლის თანხმობას.
ქართულ მხარეს, „ყაზბეგის" საბაჟო-გამშვები პუნქტის კონტროლის ზონაში არ არის არც ერთი ზემოაღნიშნული მიზეზით გაჩერებული ავტომანქანა.
საქართველოს ყველა საბაჟო-გამშვებ პუნქტზე, მებაჟე ოფიცრები აწვდიან შესაბამის ინფორმაციას ტრანზიტულად მოძრავი ტვირთების მძღოლებს „ლარსის“ საბაჟო-გამშვებ პუნქტზე არსებული მდგომარეობის შესახებ.