საქართველოს ფინანსთა სამინისტროს სახელმწიფო შიდა კონტროლის დეპარტამენტის (ჰარმონიზაციის ცენტრი) კოორდინირებით, შვედეთის ფინანსური მართვის ეროვნულ უწყებასთან (ESV) თანამშრომლობის ფარგლებში, საერთაშორისო ექსპერტების მონაწილეობით გაიმართა სამუშაო შეხვედრა, რომელიც ,,საბიუჯეტო პროგრამის ფარგლებში მომსახურების გაწევის შესახებ“ შეთანხმების საკითხებს მიეძღვნა. მასში მონაწილეობა მიიღეს 6 სამინისტროსა და 13 საჯარო სამართლის იურიდიული პირის წარმომადგენლებმა.
„საბიუჯეტო პროგრამის ფარგლებში მომსახურების გაწევის შესახებ“ შეთანხმების მიზანია, სამინისტროსა და მის სისტემაში შემავალ საჯარო სამართლის იურიდიულ პირ(ებ)ს შორის მენეჯერულ ანგარიშვალდებულებაზე დაფუძნებული ურთიერთობის ჩამოყალიბება.
მიმდინარე ეტაპზე უკვე გაფორმებულია 10-მდე შეთანხმება პილოტურ პროექტში ჩართულ სამინისტროებსა და საჯარო სამართლის იურიდიულ პირებს შორის. შეხვედრების ფარგლებში, საპილოტედ შერჩეული სამინისტროებისა და საჯარო სამართლის იურიდიული პირების წარმომადგენლებს შვედმა კოლეგებმა გაუზიარეს პრაქტიკული გამოცდილება ,,საბიუჯეტო პროგრამის ფარგლებში მომსახურების გაწევის შესახებ“ შეთანხმების არსისა და საბიუჯეტო დაწესებულებებისთვის მისი დანერგვით მისაღები სარგებლის შესახებ. ამასთან, ხაზი გაესვა შეთანხმებების პრაქტიკის დანერგვის პროცესში არსებულ გამოწვევებსა და მათი გადაჭრის შესაძლებლობებს, მათ შორის, საქართველოს სახელმწიფო აუდიტის სამსახურის მიერ, მხარდაჭერილ მიდგომას აღნიშნულ საკითხთან მიმართებით.
შეთანხმებების დანერგვა/გაუმჯობესება მნიშვნელოვანი ფაქტორია ფინანსური მართვისა და კონტროლის სისტემის და შესაბამისად, პროგრამული ბიუჯეტირების დახვეწის თვალსაზრისით. აღნიშნული გამომდინარეობს საქართველოსა და ევროკავშირს შორის გაფორმებული ასოცირების შესახებ შეთანხმებიდან.