საქართველოს ფინანსთა სამინისტროში ონლაინ ფორმატში დღესაც გრძელდება ფინანსთა მინისტრ ლაშა ხუციშვილის შეხვედრები საერთაშორისო ინვესტორებთან ევრობონდების გამოშვებასთან დაკავშირებით.
შეხვედრაზე მინისტრი მათ აცნობს ქვეყნის ძირითად მაკროეკონომიკურ პოლიტიკას, გლობალური პანდემიის წინააღმდეგ საქართველოს მთავრობის მიერ გადადგმულ ნაბიჯებს, მათ შორის, მოქალაქეების სოციალური დახმარებისა და ბიზნესის მხარდაჭერის მიმართულებით, დონორთა მხარდაჭერით მოზიდულ ფინანსურ რესურსებს, ქვეყნის ეკონომიკური ზრდის პერსპექტივას, ბოლო წლებში ხელისუფლების მიერ გატარებულ სტრუქტურულ რეფორმებს, ასევე სამომავლო რეფორმების დღის წესრიგს და სხვა.
აღნიშნული პრეზენტაცია (ინგლისურ ენაზე) განთავსებულია ფინანსთა სამინისტროს ოფიციალურ ვებგვერდზე და ხელმისაწვდომია ყველა დაინტერესებული პირისთვის.