საქართველოს ფინანსთა მინისტრმა, ლაშა ხუციშვილმა და გერმანიის რეკონსტრუქციის საკრედიტო ბანკის (KfW) სამხრეთ კავკასიის ოფისის ხელმძღვანელმა, ბირგიტ ჰოლდერიდ-კრესმა ხელი მოაწერეს შეთანხმებას 3 მილიონი ევროს ოდენობის გრანტის გამოყოფის შესახებ, რომელიც მოხმარდება კოვიდპანდემიისაგან დაზარალებული ოჯახების სოციალურ დაცვას.

გერმანიის ფედერაციული რესპუბლიკის მთავრობის მიერ გამოყოფილი აღნიშნული გრანტი დაემატება გასულ წელს პანდემიის წინააღმდეგ საბრძოლველად გამოყოფილ დახმარებას, რომელიც შედგებოდა დაახლოებით 5,8 მილიონი ევროს ოდენობის გრანტისა და 15 მილიონი ევროს ოდენობის დაბალპროცენტიანი სესხისგან.

აღსანიშნავია, რომ გერმანიის ფედერაციული რესპუბლიკის მთავრობამ COVID-19-ის წინააღმდეგ ბრძოლისთვის 2020-2021 წლებში საქართველოს ჯამში, დაახლოებით, 203,8 მილიონი ევრო გამოუყო.

აღნიშნული შეთანხმებები, ნაწილია იმ ფინანსური მხარდაჭერისა, რომელიც საქართველოს მთავრობამ პარტნიორი საერთაშორისო დონორი ორგანიზაციებისგან COVID-19-ის პანდემიასთან ბრძოლისა და ქვეყნის ეკონომიკის შემდგომი რეაბილიტაციისთვის მოიზიდა.