საქართველოს ფინანსთა სამინისტრომ განაახლა მთავრობის ვალის მართვის სტრატეგია 2024-2027 წლებისთვის. სტრატეგია უზრუნველყოფს მთავრობის ვალის მართვის პოლიტიკის გამჭვირვალობასა და აღნიშნული მიმართულებით ინვესტორების, კრედიტორების, სარეიტინგო სააგენტოებისა და საზოგადოების ინფორმირებულობის ზრდას.

მთავრობის ვალის მართვის სტრატეგია მოიცავს შემდეგ ძირითად მიმართულებებს:

• მთავრობის ვალის მშპ-სთან ფარდობის უსაფრთხო დონეზე შენარჩუნება;
• მთავრობის ვალის პორტფელში ლარში დენომინირებული ვალის წილის ზრდა;
• საგარეო სესხების განვითარებაზე ორიენტირებულობის ზრდა;
• მთავრობის ვალის პორტფელის ხარჯისა და რისკის ოპტიმიზაცია;
• მთავრობის ფასიანი ქაღალდების ბაზრის განვითარება.

ვალის მართვის სტრატეგია თითოეული მიმართულებისთვის განსაზღვრავს მიზნობრივ მაჩვენებლებსა და ადგენს მათი მიღწევის გეგმას.

დოკუმენტის პროექტი გამოქვეყნებულია ფინანსთა სამინისტროს ვებგვერდზე.

პროექტის გამოქვეყნება ხაზს უსვამს სამინისტროს მზადყოფნას, გაითვალისწინოს, როგორც კერძო სექტორის, ასევე, სხვა ყველა დაინტერესებული პირის შენიშვნა/კომენტარი.

ორკვირიანი საჯარო განხილვის შემდეგ, დოკუმენტი წარედგინება მთავრობას მოსაწონებლად და გამოქვეყნდება მისი საბოლოო ვერსია.